Echonan 12
12:1
Mas o menos na e tempu ei rei Herodes a tira man riba algun hende di iglesia pa maltratá nan.
12:2
I el a laga mata Santiago, ruman di Juan, ku spada.
12:3
I ora ku el a mira ku esaki tabata agradá e hudiunan, el a sigui i a arestá Pedro tambe. Awor tabata e dianan di e Fiesta di Pan Sin Zürdeg.
12:4
I ora ku el a gar'é, el a ser'é den prizon, i a entregu'é na kuater grupo di kuater sòldá kada un pa tene warda riba djé, ku e intenshon di tres'é dilanti di e pueblo despues di Pasku.
12:5
Asina Pedro a keda será den prizon, ma e iglesia fervientemente tabata hasi orashon na Dios p'é.
12:6
I riba e mesun anochi ku Herodes tabata kier a tres'é dilanti, Pedro tabata drumí na soño meimei di dos sòldá, mará ku dos kadena. I guardianan dilanti di porta tabata warda e prizon.
12:7
I mira, direpiente un angel di Señor a presentá i un lus a iluminá e sèl. I el a stot Pedro na su kustia i a lant'é for di soño, bisando: "Lanta lihé." I e kadenanan a kai for di su mannan.
12:8
I e angel a bis'é: "Faha bo mes i bisti bo sandalia." I asina Pedro a hasi. I e angel a bis'é: "Lora bo mantel rònt di bo kurpa i siguimi."
12:9
I el a sali bai pafó i a keda siguié, i e no tabata sa ku loke e angel tabata hasi tabata realidat, ma el a kere ku ta un vishon e tabata mira.
12:10
I ora nan a pasa e promé i e di dos guardia, nan a yega na e porta di heru ku hende mester pasa pa bai den stat, i esei a habri di mes pa nan. I nan a sali bai pafó i a pasa un kaya, i mesora e angel a bai lagu'é.
12:11
I ora Pedro a bin bei, el a bisa: "Awor mi sa sigur ku Señor a manda Su angel i a reskatámi for di man di Herodes i for di tur loke e pueblo hudiu tabata spera."
12:12
I ora ku el a realisá kiko a pasa, el a bai kas di Maria, mama di Juan, kende tambe tabata wòrdu yamá Marko, kaminda hopi hende a bin huntu i tabata hasi orashon.
12:13
I ora ku el a bati na e porta di pafó, un sirbiente ku yama Rode a bin wak ken t'ei.
12:14
I ora ku el a rekonosé bos di Pedro, di alegria e no a habri e porta di pafó, ma a kore bai paden i a anunsiá ku Pedro tabata pará na porta.
12:15
I nan a bis'é: "Bo kabes no ta bon!" Ma el a keda insistí ku t'asina. I nan a keda bisa: "Ta su angel."
12:16
I Pedro a sigui bati i ora nan a habri porta, nan a mir'é i a keda asombrá.
12:17
Ma el a hasi seña ku su man pa nan keda ketu i a splika nan kon Señor a sak'é for di prizon. I el a bisa: "Bisa Santiago i e rumannan e kosnan aki." I el a sali bai un otro lugá.
12:18
I ora dia a habri, no ta poko beheit tabatin entre e sòldánan tokante di kiko por a pasa Pedro.
12:19
I ora Herodes a busk'é i no a hañ'é, el a interogá e guardianan i a duna òrdu pa laga mata nan. I el a sali di Judea bai Cesarea i a pasa algun tempu ayanan.
12:20
Awor Herodes tabata masha rabiá ku e hendenan di Tiro i Sidon. I di ún akuèrdo nan a bin serka djé, i dor ku ya kaba nan a gana amistat di Blasto, e kamarero di rei, nan tabata pidi pas, pasobra nan tabata dependé di rei su pais pa nan kuminda.
12:21
I riba un dia stipulá Herodes, bistí na su paña di rei, a bai sinta riba su trono i a kuminsá tene un diskurso pa nan.
12:22
I e hendenan tabata grita: "Ta bos di un dios i no di un hende!"
12:23
I mesora un angel di Señor a dal é, pasobra e no a duna Dios e gloria, i bichi a kom'é i el a muri.
12:24
I e palabra di Dios a sigui krese i a multipliká.
12:25
I Barnabas i Saulo a bolbe for di Jerusalèm despues ku nan a kaba di kumpli ku nan ministerio, i nan a hiba Juan, kende tambe tabata wòrdu yamá Marko, huntu ku nan.