2 Samuel 6
6:1
Awor David a bolbe reuní tur e hòmbernan skohí di Israel, trinta mil.
6:2
I David a lanta i a bai ku henter e pueblo ku tabata huntu kuné na Baala di Juda, pa trese for di ayanan e arka di Dios ku ta wòrdu yamá na e Nòmber, e nòmber mes di e SEÑOR di ehérsitonan, Kende ta sintá riba Su trono ariba di e kerubinnan.
6:3
I nan a pone e arka di Dios riba un garoshi nobo pa nan por a tres'é for di e kas di Abinadab, ku tabata keda riba e seru; i Uza ku Ahio, yu hòmbernan di Abinadab, tabata guia e garoshi nobo.
6:4
Asina nan a trese e garoshi huntu ku e arka di Dios for di e kas di Abinadab, ku tabata keda riba e seru; i Ahio tabata kana dilanti di e arka.
6:5
Mientras tantu David ku henter e kas di Israel tabata selebrá dilanti di SEÑOR ku tur klase di instrumènt trahá di palu di pino, i ku lirio, arpa, tamburein, klèper i simbal.
6:6
Ma ora nan a yega na e plenchi-di-bati-mainshi di Nakon, Uza a saka su man na e arka di Dios i a koh'é tene, pasobra e bueynan a trompeká.
6:7
I e rabia di SEÑOR a kima kontra Uza, i Dios a dal é mata ayanan pa motibu di su ireverensia; i el a muri ayanan banda di e arka di Dios.
6:8
I David a rabia pa motibu di SEÑOR Su furia kontra Uza; i e lugá ei ta wòrdu yamá Perez-uza te dia djawe.
6:9
Anto David a haña miedu di SEÑOR e dia ei; i el a bisa: "Kon e arka di SEÑOR por yega serka mi?"
6:10
I David no tabata dispuesto pa hiba e arka di SEÑOR serka djé den e stat di David; ma David a hib'é na e kas di Obed-edòm e geteo.
6:11
Asina e arka di Dios a keda na e kas di Obed-edòm e geteo pa tres luna, i SEÑOR a bendishoná Obed-edòm i tur e hendenan di su kas.
6:12
Awor nan a konta rei David, bisando: "SEÑOR a bendishoná e kas di Obed-edòm i tur loke ta pertenesé na djé, pa motibu di e arka di Dios." I David a bai i a trese e arka di Dios ku alegria for di e kas di Obed-edòm den e stat di David.
6:13
I asina a sosodé ku despues ku e kargadónan di e arka di SEÑOR a dal seis stap, David a ofresé komo sakrifisio un buey i un karné gòrdá.
6:14
I David tabata balia dilanti di SEÑOR ku tur su forsa; i David tabatin un efòd di lino bistí.
6:15
Asina David i henter e kas di Israel tabata trese e arka di SEÑOR ku gritu i ku zonidu di tròmpèt.
6:16
Anto a sosodé ku ora ku e arka di SEÑOR a yega den e stat di David, Mikal, yu muhé di Saul, a wak for di bentana i a mira rei David ta bula i ta balia dilanti di SEÑOR; i el a despresi'é den su kurason.
6:17
Asina nan a trese e arka di SEÑOR paden i a pon'é na su lugá den e tènt ku David a lanta p'é; i David a ofresé ofrendanan kimá i ofrendanan di pas dilanti di SEÑOR.
6:18
I ora David a kaba di ofresé e ofrendanan kimá i e ofrendanan di pas, el a bendishoná e pueblo den e nòmber di e SEÑOR di ehérsitonan.
6:19
Ademas, el a parti pa henter e pueblo, pa henter e multitut di Israel, tantu hòmber komo muhé, un pan buskuchi, un pan di dadel i un pan di rasenchi pa kada un. Despues henter e pueblo a bai kada un pa su kas.
6:20
Ma ora David a bin bèk pa bendishoná e hendenan di su kas, Mikal, yu muhé di Saul, a sali pa kontra ku David i a bisa: "Esta bunita e rei di Israel a distinguí su mes awe! El a eksponé su mes awe den bista di e kriánan di su sirbidónan, manera un hende bulgar ta eksponé su mes sin ni un tiki di bèrguensa!"
6:21
Anto David a bisa Mikal: "Tabata dilanti di SEÑOR, Kende a skohemi riba bo tata i riba henter su kas, pa nombrami komo gobernante riba e pueblo di SEÑOR, riba Israel; pesei lo mi selebrá dilanti di SEÑOR.
6:22
I lo mi ta mas despresiá ainda ku esaki i lo mi ta umilde den mi mes bista; ma serka e kriánan di kendenan bo a papia, serka nan lo mi ta distinguí."
6:23
I Mikal, yu muhé di Saul, no a haña yu te dia di su morto.