2 Samuel 4
4:1
Awor ora ku Is-boset, Saul su yu hòmber, a tende ku Abner a muri na Hebròn, el a pèrdè kurashi, i henter Israel a keda spantá.
4:2
I Saul su yu hòmber tabatin dos hòmber ku tabata komandante di trupa: nòmber di esun tabata Baana, i nòmber di e otro Rekab, yu hòmbernan di Rimon e beerotita, di e yu hòmbernan di Benjamin (pasobra Beerot tambe ta wòrdu konsiderá parti di Benjamin,
4:3
i e beerotitanan a hui bai Gitaim i a keda stranhero ayanan te dia djawe).
4:4
Awor Jonatan, Saul su yu hòmber, tabatin un yu hòmber ku pia mankaron. E tabatin sinku aña dia ku notisia tokante di Saul i Jonatan a yega for di Jezreel, i su yaya a koh'é i a hui bai kuné. I a sosodé ku den su purá pa hui e mucha a kai i a bira lam. I su nòmber tabata Mefi-boset.
4:5
Awor Rekab i Baana, yu hòmbernan di Rimon e beerotita, a bai i a yega na e kas di Is-boset na e ora mas kalor di dia, mientras ku e tabata tuma su sosiegu di mèrdia.
4:6
I nan a drenta bai te meimei di e kas komo si fuera ta trigo nan a bin buska, i nan a hink'é den su barika; anto Rekab i su ruman hòmber Baana a hui bai.
4:7
I ora nan a drenta den e kas, mientras ku Is-boset tabata drumí riba su kama den su kamber, nan a dal é mata i a kita su kabes afó. I nan a kohe su kabes bai kuné i a biaha riba kaminda di Arabá henter anochi.
4:8
Anto nan a trese e kabes di Is-boset pa David na Hebròn, i a bisa rei: "At'e kabes di Is-boset, yu hòmber di Saul, bo enemigu, kende tabata buskabo pa mata; i awe SEÑOR a duna señor mi rei vengansa riba Saul i su desendientenan."
4:9
I David a kontestá Rekab i su ruman hòmber Baana, yu hòmbernan di Rimon e beerotita, i a bisa nan: "Manera SEÑOR ta biba, Kende a redimí mi bida for di tur angustia,
4:10
dia ku un hende a bisami: 'Mira, Saul ta morto,' i a kere ku e tabata trese bon notisia, mi a gar'é i a mat'é na Siklag, loke tabata e rekompensa ku mi a dun'é pa su notisia.
4:11
Kuantu mas, ora hòmbernan malbado a mata un hòmber hustu den su mes kas riba su kama, lo mi no eksigí awor su sanger for di boso man i destruí boso for di riba tera?"
4:12
E ora ei David a duna òrdu na su sirbidónan hoben, i nan a mata nan i a kòrta nan mannan i nan pianan kit'afó i a kologá nan pegá ku e tanki na Hebròn. Ma nan a kohe e kabes di Is-boset i a dera esaki den e graf di Abner na Hebròn.