2 Samuel 22

BSNP Edit

2 Samuel 22

22:1 I David a dirigí e palabranan di e kantika aki na SEÑOR, dia ku SEÑOR a libr'é for di man di tur su enemigunan i for di man di Saul.

22:2 I el a bisa: "SEÑOR ta mi baranka i mi fòrti, i mi libertador;

22:3 mi Dios, mi baranka, den Kende mi ta tuma refugio; mi eskudo i e kachu di mi salbashon, mi toren haltu i mi refugio; mi salbador, Abo ta salbami di violensia.

22:4 Mi ta sklama na SEÑOR, Kende ta digno di ser alabá; i mi ta salbá for di mi enemigunan.

22:5 Pasobra e olanan di morto a enserámi; e torentenan di destrukshon a terorisámi;

22:6 e kabuyanan di Seol a rondonámi; e trampanan di morto a konfrontámi.

22:7 Den mi angustia mi a sklama na SEÑOR, sí, mi a sklama na mi Dios; i for di Su tèmpel El a tende mi bos, i mi sklamashon pa yudansa a yega te na Su orea.

22:8 "E ora ei tera a sakudí i a tembla, e fundeshinan di shelu tabata tembla i a wòrdu sakudí, pasobra E tabata rabiá.

22:9 Huma tabata sali for di Su nanishi bai ariba, i kandela for di Su boka tabata devorá; karbon a wòrdu sendí dor di esaki.

22:10 Tambe El a inkliná e shelunan i a baha bin ku skuridat profundo bou di Su pianan.

22:11 I El a kabalgá riba un kerubin i a bula, si, El a paresé riba e halanan di bientu.

22:12 I El a hasi skuridat bira un kapa rònt di djE, un kantidat di awa, nubianan skur di shelu.

22:13 For di e splendor Su dilanti karbon di kandela a wòrdu sendí.

22:14 SEÑOR a strena for di shelu, i e Haltísimo a hasi Su bos resoná.

22:15 I El a tira flechanan i a plama nan, lamper, i a konfundí nan.

22:16 E ora ei e vayenan di laman a paresé, e fundeshinan di mundu a keda bisto, dor di e reprendementu di SEÑOR, debí na e suplamentu pisá di e rosea di Su nanishi.

22:17 "El a saka Su man for di ariba, El a garami; El a sakami for di hopi awanan.

22:18 El a librami di mi enemigu poderoso, di esnan ku tabata odiami, pasobra nan tabata muchu fuerte pa mi.

22:19 Nan a konfrontámi den e dia di mi kalamidat, ma SEÑOR tabata mi sosten.

22:20 Tambe El a sakami hibami na un lugá espasioso; El a reskatámi, pasobra E tabatin delisia den mi.

22:21 "SEÑOR a rekompensámi segun mi hustisia; segun e limpiesa di mi mannan El a rekompensámi.

22:22 Pasobra mi a warda e kamindanan di SEÑOR i no a aktua ku maldat kontra mi Dios.

22:23 Pasobra tur Su ordenansanan tabata mi dilanti, i pa loke ta Su statutonan, mi no a apartá mi mes for di nan.

22:24 Tambe mi tabata perfekto Su dilanti, i mi a warda mi mes for di mi inikidat.

22:25 Pesei SEÑOR a rekompensámi segun mi hustisia, segun mi limpiesa dilanti di Su bista.

22:26 "Na e hende miserikòrdioso Bo ta mustra Bo mes miserikòrdioso, na e hende rekto Bo ta mustra Bo mes rekto;

22:27 na e hende puru Bo ta mustra Bo mes puru, i na e hende pèrvèrso Bo ta mustra Bo mes severo.

22:28 I Bo ta salba un pueblo afligí, ma Bo wowo ta riba e arogantenan, kendenan Bo ta rebahá.

22:29 Pasobra Bo ta mi lampi, O SEÑOR; i SEÑOR ta iluminá mi skuridat.

22:30 Pasobra ku Bo mi por kaba ku un ehérsito; ku mi Dios mi por bula ofer di un muraya.

22:31 "Pa loke ta Dios, Su kaminda ta perfekto; e palabra di SEÑOR ta probá; E ta un eskudo pa tur esnan ku ta tuma refugio den djE.

22:32 Pasobra ta ken ta Dios, si no ta SEÑOR? I ta ken ta un baranka, si no ta nos Dios?

22:33 Dios ta mi fòrti fuerte, i E ta pone esun rekto den Su kaminda.

22:34 E ta hasi mi pianan manera pia di biná, i ta ponemi riba mi lugánan haltu.

22:35 E ta tren mi mannan pa bataya, asina ku mi brasanan por dobla un bog di bròns.

22:36 Tambe Bo a dunami e eskudo di Bo salbashon, i Bo gentilesa ta hasimi grandi.

22:37 Bo ta hancha e kaminda bou di mi, i mi pianan no ta slep.

22:38 "Mi a pèrsiguí mi enemigunan i a destruí nan, i mi no a hal'atras te ora nan a wòrdu destruí.

22:39 I mi a devorá nan i a kibra nan na pida-pida, asina ku nan no a lanta mas; i nan a kai bou di mi pianan.

22:40 Pasobra Bo a fahami ku forsa pa bataya; Bo a hasi esnan ku a lanta kontra mi someté nan mes na mi.

22:41 Tambe Bo a hasi mi enemigunan bira lomba pa mi, i mi a destruí esnan ku tabata odiami.

22:42 Nan a sklama, ma no tabatin ningun hende pa salba, na SEÑOR, ma E no a kontestá nan.

22:43 E ora ei mi a bati nan hasi nan fini-fini manera stòf di tera; mi a plècha i a trapa nan manera lodo di kaya.

22:44 "Tambe Bo a librami di e pleitunan di mi pueblo; Bo a wardami komo kabesante di e nashonnan; un pueblo ku nunka mi a konosé ta sirbimi.

22:45 Stranheronan ta pretendé obedensia na mi; asina ku nan tendemi, nan ta obedesémi.

22:46 Stranheronan ta pèrdè kurashi, i ta sali na temblamentu for di nan fòrtinan.

22:47 "SEÑOR ta biba, i bendishoná sea mi baranka; i halsá sea Dios, e baranka di mi salbashon,

22:48 e Dios ku ta ehekutá vengansa pa mi, i ta hasi pueblonan someté nan mes na mi,

22:49 Kende ta librami tambe di mi enemigunan; sí, Bo ta halsami ariba di esnan ku ta lanta kontra mi; Bo ta reskatámi for di e hende violento.

22:50 Pesei lo mi dunaBo gradisimentu, O SEÑOR, meimei di e nashonnan, i lo mi kanta alabansa na Bo nòmber.

22:51 E ta un toren di salbashon pa Su rei, i ta mustra miserikòrdia na Su ungí, na David i su desendientenan pa semper."

2 Samuel 21 2 Samuel 23