2 Reinan 14
14:1
Den e di dos aña di Joas, yu hòmber di Joakaz, rei di Israel, Amasias, yu hòmber di Joas, rei di Juda, a bira rei.
14:2
E tabatin bint'i sinku aña dia ku el a bira rei, i el a reina bint'i nuebe aña na Jerusalèm. I nòmber di su mama tabata Joadan di Jerusalèm.
14:3
I el a hasi bon den bista di SEÑOR, ounke no manera su tata David; el a hasi konforme tur loke su tata Joas a hasi.
14:4
Solamente e lugánan haltu no a wòrdu kitá; ainda e pueblo tabata ofresé sakrifisio i kima sensia riba e lugánan haltu.
14:5
Awor a sosodé ku asina ku e reino tabata firme den su man, el a mata su sirbidónan ku a mata su tata, e rei.
14:6
Ma e yu hòmbernan di e matadónan e no a laga mata, konforme loke ta pará skirbí den e buki di lei di Moisés, manera SEÑOR a ordená, bisando: "E tatanan no mester wòrdu matá pa motibu di e yu hòmbernan, ni e yu hòmbernan no mester wòrdu matá pa motibu di e tatanan; ma kada un mester wòrdu matá pa su mes piká."
14:7
El a mata dies mil edomita den e Vaye di Salu i a konkistá Sela den bataya, i a yam'é Jokteel te dia djawe.
14:8
Anto Amasias a manda mensaheronan serka Joas, yu hòmber di Joakaz, yu hòmber di Jehú, rei di Israel, bisando: "Bin, laga nos enfrentá otro."
14:9
I Joas, rei di Israel, a manda rospondi pa Amasias, rei di Juda, bisando: "E mata di sumpiña ku tabata na Líbano a manda rospondi pa e palu di seda ku tabata na Líbano, bisando: 'Duna bo yu muhé na mi yu hòmber komo esposa.' Ma a pasa un bestia di mondi ku tabata na Líbano, i esaki a trapa e mata di sumpiña.
14:10
Di bèrdat bo a derotá Edòm, i bo kurason a bira orguyoso. Gosa di bo gloria i keda kas; pasobra pakiko lo bo buska problema, asina ku abo lo kai i Juda huntu ku bo?"
14:11
Ma Amasias no kier a tende. Asina Joas, rei di Israel, a bai; i é ku Amasias, rei di Juda, a enfrentá otro na Bèt-semes, ku ta pertenesé na Juda.
14:12
I Juda a wòrdu derotá dor di Israel, i nan a hui bai, kada un pa su tènt.
14:13
E ora ei Joas, rei di Israel, a kapturá Amasias, rei di Juda, yu hòmber di Joas, yu hòmber di Okozias, na Bèt-semes, i a bin Jerusalèm i a basha e muraya di Jerusalèm abou, for di e Porta di Efrain te na e Porta di Skina, kuater shen kodo.
14:14
I el a kohe tur e oro i plata, i tur e artíkulonan-di-uzo ku a wòrdu hañá den e kas di SEÑOR, i den e lugánan-di-warda-tesoro di e kas di rei, i tambe e rehennan, i a bolbe Samaria.
14:15
Awor e demas echonan di Joas ku el a hasi--su poder i kon el a bringa kontra Amasias, rei di Juda--nan no ta pará skirbí den e Buki di Krónikanan di e reinan di Israel?
14:16
Asina Joas a bai sosegá serka su tatanan i a wòrdu derá na Samaria serka e reinan di Israel; i su yu hòmber Jeroboam a bira rei na su lugá.
14:17
I Amasias, yu hòmber di Joas, rei di Juda, a biba diesinku aña despues di morto di Joas, yu hòmber di Joakaz, rei di Israel.
14:18
Awor e demas echonan di Amasias, nan no ta pará skirbí den e Buki di Krónikanan di e reinan di Juda?
14:19
I nan a konspirá kontra djé na Jerusalèm i el a hui bai Lakis; ma nan a laga pèrsiguié te na Lakis i a mat'é ayanan.
14:20
E ora ei nan a tres'é riba kabainan i el a wòrdu derá na Jerusalèm serka su tatanan den e stat di David.
14:21
I henter e pueblo di Juda a tuma Azarias, kende tabatin dieseis aña, i a hasié rei na lugá di su tata Amasias.
14:22
El a konstruí Elat i a debolbé esaki na Juda, despues ku rei a bai sosegá serka su tatanan.
14:23
Den e di diesinku aña di Amasias, yu hòmber di Joas, rei di Juda, Jeroboam, yu hòmber di Joas, rei di Israel, a bira rei na Samaria i a reina kuarent'i un aña.
14:24
I el a hasi malu den bista di SEÑOR; e no a bandoná tur e pikánan di Jeroboam, yu hòmber di Nabat, kualnan el a hasi Israel kometé.
14:25
El a restorá e frontera di Israel for di e entrada di Hamat te na Laman di Arabá, konforme e palabra di SEÑOR, e Dios di Israel, kual El a papia pa medio di Su sirbidó Jonas, yu hòmber di profeta Amitai, kende tabata di Gat-hefer.
14:26
Pasobra SEÑOR a mira ku e aflikshon di Israel, tabata mashá amargo; pasobra no tabatin ni esklabu ni hende liber, i no tabatin ningun yudadó pa Israel.
14:27
I SEÑOR no a bisa ku E lo a kita nòmber di Israel for di bou di shelu, ma El a salba nan pa medio di e man di Jeroboam, yu hòmber di Joas.
14:28
Awor e demas echonan di Jeroboam i tur loke ku el a hasi--su poder, kon el a bringa i kon el a rekobrá Damasko i Hamat pa Israel, kualnan tabata pertenesé na Juda--nan no ta pará skirbí den e Buki di Krónikanan di e reinan di Israel?
14:29
I Jeroboam a bai sosegá serka su tatanan, e reinan di Israel, i su yu hòmber Zakarias a bira rei na su lugá.