2 Reinan 13
13:1
Den e di bint'i tres aña di Joas, yu hòmber di Okozias, rei di Juda, Joakaz, yu hòmber di Jehú, a bira rei di Israel na Samaria, i el a reina dieshete aña.
13:2
I el a hasi malu den bista di SEÑOR, i a sigui e pikánan di Jeroboam, yu hòmber di Nabat, ku kualnan el a hasi Israel peka; e no a bandoná nan.
13:3
Asina e rabia di SEÑOR a sende kontra Israel, i E tabata entregá nan kontinuamente den man di Hazael, rei di Siria, i den man di Bèn-adad, yu hòmber di Hazael.
13:4
Anto Joakaz a roga SEÑOR, i SEÑOR a skuch'é; pasobra El a mira e opreshon di Israel, kon rei di Siria tabata oprimí nan.
13:5
I SEÑOR a duna Israel un libertador, asina ku nan a skapa for di man di e sirionan; i e yunan di Israel a biba den nan tèntnan manera antes.
13:6
Sinembargo, nan no a bandoná e pikánan di e kas di Jeroboam, ku kualnan el a hasi Israel peka, ma a kana den nan; i e imagen di Asera tambe a keda para na Samaria.
13:7
Pasobra di e ehérsito el a laga pa Joakaz no mas ku sinkuenta koredó di kabai, dies garoshi i dies mil sòldá-na-pia; pasobra rei di Siria a destruí nan i a hasi nan manera stòf den tempu di bati mainshi.
13:8
Awor e demas echonan di Joakaz i tur loke ku el a hasi i su poder, nan no ta pará skirbí den e Buki di Krónikanan di e reinan di Israel?
13:9
I Joakaz a bai sosegá serka su tatanan i nan a der'é na Samaria; i su yu hòmber Joas a bira rei na su lugá.
13:10
Den e di trint'i shete aña di Joas, rei di Juda, Joas, yu hòmber di Joakaz, a bira rei di Israel na Samaria, i a reina dieseis aña.
13:11
I el a hasi malu den bista di SEÑOR; e no a bandoná tur e pikánan di Jeroboam, yu hòmber di Nabat, ku kualnan el a hasi Israel peka, ma el a kana den nan.
13:12
Awor e demas echonan di Joas i tur loke ku el a hasi i su poder ku kual el a bringa kontra Amasias, rei di Juda, nan no ta pará skirbí den e Buki di Krónikanan di e reinan di Israel?
13:13
Asina Joas a bai sosegá serka su tatanan, i Jeroboam a sinta riba su trono; i Joas a wòrdu derá na Samaria huntu ku e reinan di Israel.
13:14
Ora Eliseo a bira malu di e malesa ku lo a kousa su morto, Joas, rei di Israel, a bin serka djé i a yor'é i a bisa: "Mi tata, mi tata, e garoshinan di Israel i su koredónan di kabai!"
13:15
I Eliseo a bis'é: "Kohe un bog i algun flecha." Asina el a kohe un bog i algun flecha.
13:16
Anto el a bisa rei di Israel: "Pone bo man na e bog." I el a pone su man na djé; e ora ei Eliseo a pone su mannan riba rei su mannan.
13:17
I el a bisa: "Habri e bentana di pariba," i el a habrié. Anto Eliseo a bisa: "Tira!" I el a tira. I el a bisa: "E flecha di viktoria di SEÑOR, e flecha di viktoria riba Siria; pasobra lo bo derotá e sirionan na Afek te ora bo a destruí nan."
13:18
E ora ei el a bisa: "Kohe e flechanan," i el a kohe nan. I el a bisa rei di Israel: "Dal riba suela." Anto el a dal tres biaha i a stòp.
13:19
E ora ei e hòmber di Dios a rabia kuné i a bisa: "Bo mester a bati sinku òf seis biaha, e ora ei lo bo a dal Siria te ora ku bo a destruié. Ma awor lo bo dal Siria tres biaha so."
13:20
I Eliseo a muri, i nan a der'é. Awor e trupanan di e moabitanan tabatin kustumber di invadí e tera tur aña na e tempu di primavera.
13:21
I ora nan tabata dera un hòmber, ata, nan a mira un trupa di bandido; i nan a tira e hòmber den e graf di Eliseo. I ora ku e morto a toka ku e wesunan di Eliseo, el a rebibá i a lanta para riba su pia.
13:22
Awor Hazael, rei di Siria, a oprimí Israel tur e dianan di Joakaz.
13:23
Ma SEÑOR a mustra grasia na nan i tabatin kompashon ku nan, i a bolbe serka nan pa motibu di Su aliansa ku Abraham, Isaak i Jakòb, i no kier a destruí nan, ni tira nan for di Su presensia te dia djawe.
13:24
Ora Hazael, rei di Siria, a muri, su yu hòmber Bèn-adad a bira rei na su lugá.
13:25
E ora ei Joas, yu hòmber di Joakaz, a bolbe kita for di man di Bèn-adad, yu hòmber di Hazael, e statnan ku esaki a kita den guera for di man di su tata Joakaz. Tres biaha Joas a derot'é i a rekobrá e statnan di Israel.