2 Reinan 10
10:1
Awor Akab tabatin setenta yu hòmber na Samaria. I Jehú a skirbi karta i a manda esakinan Samaria, pa e gobernantenan di Jezreel, e ansianonan, i pa e edukadónan di e yunan di Akab, bisando:
10:2
"I awor, ora ku e karta aki yega serka boso, komo ku e yu hòmbernan di boso shon ta serka boso, i boso tin garoshi, kabai, i un stat fortifiká tambe, i arma,
10:3
skohe esun di mas mihó i di mas rekto di e yu hòmbernan di boso shon, i pon'é riba trono di su tata, i bringa pa e kas di boso shon."
10:4
Ma nan tabatin masha miedu i a bisa: "Mira, e dos reinan no por a enfrent'é; kon nos por enfrent'é anto?"
10:5
I esun ku tabata enkargá ku e kas, i esun ku tabata enkargá ku e stat, e ansianonan, i e edukadónan di e muchanan, a manda rospondi pa Jehú, bisando: "Nos ta bo sirbidó, tur loke bo bisa nos, nos lo hasi, nos lo no hasi ningun hende rei; hasi loke ta bon den bo bista."
10:6
E ora ei Jehú a skirbi nan un karta pa di dos biaha, bisando: "Si boso ta na mi banda, i boso kier skucha mi bos, kohe e kabesnan di e hòmbernan, e yu hòmbernan di boso shon, i bin serka mi na Jezreel mañan na e ora aki." Awor e yu hòmbernan di rei, setenta persona, tabata serka e hòmbernan grandi di e stat, kendenan tabata kria nan.
10:7
I a sosodé ku ora e karta a yega serka nan, nan a kohe e yu hòmbernan di rei, i a mata nan, setenta persona, i a pone nan kabes den makutu, i a manda nan p'é na Jezreel.
10:8
Ora ku e mensahero a bin i a konta Jehú, bisando: "Nan a trese e kabesnan di e yu hòmbernan di rei." El a bisa: "Pone nan na dos monton na entrada di e porta di stat te mainta."
10:9
Awor a sosodé ku su manisé el a sali; i el a para, dilanti di henter e pueblo i a bisa: "Boso ta inosente; mira, t'ami a konspirá kontra mi shon i a mat'é, ma ta ken a mata tur esakinan?
10:10
Sabi anto ku nada lo no keda sin wòrdu kumplí di e palabra di SEÑOR, ku SEÑOR a papia tokante di e kas di Akab, pasobra SEÑOR a hasi loke ku El a papia pa medio di Su sirbidó Elias."
10:11
Asina Jehú a mata tur esnan ku a keda di e kas di Akab na Jezreel, i tur su hòmbernan grandi i su konosínan i su saserdotenan, te ora ku el a lagu'é sin sobrebibiente.
10:12
E ora ei el a lanta bai Samaria. I na kaminda, ora ku e tabata na Bèt-eked di e wardadónan di karné,
10:13
Jehú a topa ku e rumannan di Okozias, rei di Juda, i a bisa: "Ta ken boso ta?" I nan a kontestá: "Nos ta ruman di Okozias; i nos a bin pa saludá e yu hòmbernan di rei i e yu hòmbernan di reina mama."
10:14
I el a bisa: "Kohe nan bibu." Asina nan a kohe nan bibu, i a mata nan na e pos di Bèt-eked, kuarent'i dos hòmber; i e no a laga ni un di nan.
10:15
Awor ora ku el a bai for di einan, el a topa Jonadab, yu hòmber di Rekab, ta bin kontr'é; i el a salud'é i a bis'é: "Bo kurason ta sinsero manera mi kurason ta sinsero ku bo kurason?" I Jonadab a kontestá: "Sí!" Jehú a bisa: "Si t'asina, dunami un man." I el a dun'é un man, i el a yud'é subi serka djé den garoshi.
10:16
I el a bisa: "Ban ku mi i mira mi zelo pa SEÑOR." Asina el a lagu'é kore den su garoshi.
10:17
I ora ku el a yega Samaria, el a mata tur esnan ku a keda di e kas di Akab na Samaria, te ora ku el a kaba kuné, konforme e palabra di SEÑOR ku El a papia ku Elias.
10:18
E ora ei Jehú a reuní henter e pueblo i a bisa nan: "Akab a sirbi Baal djis un poko; Jehú lo sirbié muchu mas.
10:19
I awor, manda yama tur e profetanan di Baal, tur su adoradónan i tur su saserdotenan; no laga ni un hende keda sin bin, pasobra mi tin un sakrifisio grandi pa Baal; ken ku keda sin bin lo no keda na bida." Ma Jehú a hasi esaki ku astusia, pa e por a destruí e adoradónan di Baal.
10:20
I Jehú a bisa: "Santifiká un asamblea solèm pa Baal." I nan a proklamá esaki.
10:21
E ora ei Jehú a manda buska den henter Israel; i tur e adoradónan di Baal a bin, asina ku no a keda ni un hòmber ku no a bin. I ora nan a drenta e kas di Baal, e kas di Baal a yena di punta pa punta.
10:22
I el a bisa esun ku tabata enkargá ku e lugá di warda paña: "Saka paña pa tur e adoradónan di Baal." Asina el a saka paña pa nan.
10:23
I Jehú a drenta e kas di Baal huntu ku Jonadab, yu hòmber di Rekab; i el a bisa e adoradónan di Baal: "Buska i mira pa no tin ningun di e sirbidónan di SEÑOR huntu ku boso akinan, sino únikamente e adoradónan di Baal."
10:24
Anto nan a drenta pa ofresé sakrifisionan i ofrendanan kimá. Awor Jehú a nombra ochenta hòmber pa su mes, pa tene warda pafó, i el a bisa: "Si kualkier di e hòmbernan ku mi trese den boso man skapa, esun ku pèrmitié skapa lo duna su bida na lugá di esun ku a skapa."
10:25
Anto a sosodé ku asina ku el a kaba di ofresé e ofrenda kimá, Jehú a bisa e guardia i e ofisialnan real: "Drenta, mata nan; no laga ningun sali." I nan a mata nan ku filo di spada; i e guardia i e ofisialnan real a benta nan pafó, i a bai den e kamber paden di e kas di Baal.
10:26
I nan a saka e pilarnan sagrado di e kas di Baal afó i a kima nan.
10:27
Tambe nan a kibra e pilar sagrado di Baal i a basha e kas di Baal abou, i a hasié un bèster te dia djawe.
10:28
Asina Jehú a eliminá Baal for di Israel.
10:29
Sinembargo, enkuanto e pikánan di Jeroboam, yu hòmber di Nabat, ku el a hasi Israel kometé, for di esakinan Jehú no a apartá su mes, esta, for di e bishénan di oro ku tabata na Bèt-èl i ku tabata na Dan.
10:30
I SEÑOR a bisa Jehú: "Pasobra bo a hasi bon dor di ehekutá loke ta bon den Mi bista, i a hasi ku e kas di Akab konforme tur loke tabata den Mi kurason, bo yu hòmbernan di e di kuater generashon lo sinta riba e trono di Israel."
10:31
Ma Jehú no a pèrkurá di kana den e lei di SEÑOR, e Dios di Israel, ku henter su kurason; e no a bandoná e pikánan di Jeroboam, ku el a hasi Israel kometé.
10:32
Den e dianan ei SEÑOR a kuminsá kòrta kita algun parti for di Israel; i Hazael a derotá nan den henter e teritorio di Israel:
10:33
for di Jordan bai pariba, henter e tera di Galaad, e gaditanan, e rubenitanan i e manasitanan, for di Aroer, ku ta keda banda di e vaye di Arnon, tantu Galaad komo Basan.
10:34
Awor e demas echonan di Jehú i tur loke ku el a hasi i tur su poder, nan no ta pará skirbí den e Buki di Krónikanan di e reinan di Israel?
10:35
I Jehú a bai sosegá serka su tatanan i nan a der'é na Samaria. I su yu hòmber Joakaz a bira rei na su lugá.
10:36
Awor e tempu ku Jehú a reina riba Israel na Samaria tabata bint'i ocho aña.