2 Korintionan 8

BSNP Edit

2 Korintionan 8

8:1 Awor, rumannan, nos kier laga boso sa di e grasia di Dios ku a wòrdu duná den e iglesianan di Masedonia,

8:2 ku den hopi prueba di aflikshon nan abundansia di goso i nan pobresa grandi a rebosá den e rikesa di nan generosidat.

8:3 Pasobra mi ta duna testimonio ku segun nan tabata por, i mas ku nan tabata por, nan a duna boluntariamente,

8:4 rogando nos ku masha súplika pa e privilegio di por partisipá den e manteneshon di e santunan,

8:5 i esaki, no manera nos a spera, ma promé nan a duna nan mes na Señor i na nos, segun e boluntat di Dios.

8:6 Pesei nos a roga Tito ku, meskos ku antes el a hasi un kuminsamentu, asina tambe e kompletá den boso e obra di grasia aki.

8:7 Ma meskos ku boso ta abundá den tur kos, den fe i palabra i konosementu i den tur seriedat i den boso amor pa nos, mira pa boso abundá den e obra di grasia aki tambe.

8:8 Mi no ta papia esaki komo un mandato, ma pa proba, dor di e seriedat di otronan, e sinseridat di boso amor tambe.

8:9 Pasobra boso konosé e grasia di nos Señor Jesu-Cristo, ku ounke E tabata riku, sinembargo pa boso motibu El a bira pober, pa boso dor di Su pobresa por a bira riku.

8:10 I mi ta duna mi opinion den e asunto aki, pasobra esaki ta pa boso bentaha, kendenan tabata e proménan ku a kuminsá un aña pasá, no solamente pa hasi esaki, ma tambe pa deseá di hasié.

8:11 Ma awor, kaba di hasié tambe, pa meskos ku boso tabata asina boluntario pa hasié, asina tambe e por wòrdu kumplí dor di e medionan ku boso tin.

8:12 Pasobra si e boluntat t'ei, e ta aseptabel segun loke un hende tin, no segun loke e no tin.

8:13 Pasobra esaki no ta pa fasilidat di otronan i pa boso aflikshon, ma pa tin igualdat--

8:14 den e tempu presente aki boso abundansia ta un provishon den nan nesesidat, pa nan abundansia tambe por bira un provishon den boso nesesidat, pa por tin igualdat;

8:15 manera ta pará skirbí: "Esun ku a rekohé hopi no tabatin di mas, i esun ku a rekohé poko no tabata falta nada."

8:16 Ma grasia sea na Dios, Kende ta pone e mesun preokupashon pa boso den kurason di Tito.

8:17 Pasobra no solamente el a aseptá nos petishon, ma komo ku e mes ta masha dediká, el a bai serka boso di su mes boluntat.

8:18 I nos a manda huntu kuné e ruman, kende su fama den e asuntonan di evangelio a plama den tur e iglesianan;

8:19 i no solamente esaki, ma el a wòrdu skohí tambe dor di e iglesianan pa biaha huntu ku nos den e obra di grasia aki, kual ta wòrdu atministrá dor di nos pa e gloria di Señor mes, i pa mustra nos boluntat,

8:20 tumando prekoushon pa ni un hende no desakreditá nos den nos atministrashon di e ofrenda generoso aki;

8:21 pasobra nos ta pèrkurá pa hasi loke ta onorabel, no solamente den bista di Señor, ma tambe den bista di hende.

8:22 I nos a manda huntu ku nan nos ruman, kende nos a komprobá hopi biaha i a hañ'é diligente den hopi kos, ma awor mas diligente ainda, pa motibu di su konfiansa grandi den boso.

8:23 Pa loke ta Tito, e ta mi kompañero i kolaborador meimei di boso; pa loke ta nos rumannan, nan ta mensaheronan di e iglesianan, un gloria pa Cristo.

8:24 Pesei públikamente, dilanti di e iglesianan, mustra nan e prueba di boso amor i di nos motibu pa gaba boso.

2 Korintionan 7 2 Korintionan 9