2 Kronikonan 9
9:1
Awor ora reina di Saba a tende di e fama di Salomon, el a bin Jerusalèm pa pone Salomon na prueba ku preguntanan difisil. E tabata kompañá pa un grupo masha grandi, ku kamelnan kargá ku speserei i un kantidat grandi di oro i piedra presioso; i ora ku el a yega serka Salomon, el a papia kuné di tur loke tabatin riba su kurason.
9:2
I Salomon a kontestá tur su preguntanan; no tabatin nada ku tabata muchu difisil pa Salomon splika reina di Saba.
9:3
I ora reina di Saba a mira e sabiduria di Salomon, e kas ku el a traha,
9:4
e kuminda na su mesa, e òrdu di sinta di su ofisialnan, e manera di sirbi di su sirbidónan i nan paña di bisti, su koperonan i nan paña di bisti, i su trapi ku e tabata subi pa bai e kas di SEÑOR, el a keda boka habrí.
9:5
E ora ei el a bisa rei: "Tabata bèrdat loke mi a tende na mi mes tera tokante di bo palabranan i bo sabiduria.
9:6
Sinembargo, mi no a kere nan palabranan te ora mi a bin i a mira ku mi mes wowo. I mira, ni mitar di e grandesa di bo sabiduria nan no a kontami. Bo ta surpasá e palabranan ku mi a tende.
9:7
Ki bendishoná bo hòmbernan ta, ki bendishoná e sirbidónan di bo aki ta, ku kontinuamente ta para bo dilanti i ta tende bo sabiduria.
9:8
Bendishoná sea SEÑOR bo Dios, Kende tabatin delisia den bo, i a ponebo riba Su trono komo rei pa SEÑOR bo Dios; pasobra bo Dios a stima Israel i a stablesé nan pa semper, pesei El a hasibo rei riba nan, pa hasi huisio i hustisia."
9:9
E ora ei reina di Saba a duna rei shent'i binti talento di oro i un kantidat masha grandi di speserei i piedra presioso; nunka tabatin speserei asina manera esnan ku reina di Saba a duna rei Salomon.
9:10
I e sirbidónan di Huram i e sirbidónan di Salomon ku tabata trese oro for di Ofir, tambe a trese palu di sándalo i piedra presioso.
9:11
I for di e palunan di sándalo rei a traha trapi pa e kas di SEÑOR i pa rei su palasio, i salterio i arpa pa e kantadónan; nunka algu asina no a wòrdu mirá na tera di Juda.
9:12
I rei Salomon a duna reina di Saba tur loke ku e tabata deseá, tur loke el a pidi, muchu mas ku loke el a trese pa rei. E ora ei el a bai bèk na su mes pais huntu ku su sirbidónan.
9:13
Awor e peso di oro ku a drenta pa Salomon den un aña tabata seis shent'i sesent'i seis talento di oro,
9:14
fuera di loke e negoshantenan i komersiantenan a trese; i tur e reinan di Arabia i e gobernantenan di e pais a trese oro i plata pa Salomon.
9:15
I rei Salomon a traha dos shen eskudo grandi di oro batí, i a uza seis shen siklo di oro batí pa kada eskudo grandi.
9:16
I el a traha tres shen eskudo di oro batí i a uza tres shen siklo di oro pa kada eskudo, i rei a pone nan den e kas di mondi-será di Líbano.
9:17
Ademas, rei a traha un trono grandi di ivor i a fur'é ku oro puru.
9:18
I e trono tabatin seis tret, i un banki-pa-pia trahá di oro, pegá na e trono; i tabatin man na kada banda di e asiento i dos leon pará banda di e mannan.
9:19
I tabatin diesdos leon pará einan na kada banda riba e seis tretnan; nada similar no a wòrdu trahá pa ningun otro reino.
9:20
I tur e kopanan di bebe di rei Salomon tabata di oro i tur e artíkulonan-di-uzo di e kas di e mondi-será di Líbano tabata di oro puru; plata no tabata wòrdu konsiderá di balor den e dianan di Salomon.
9:21
Pasobra rei tabatin barkunan ku tabata bai Tarsis ku e sirbidónan di Huram; un biaha den kada tres aña e barkunan di Tarsis tabata bin trese oro, plata, ivor, makaku i pouwis.
9:22
Asina rei Salomon a surpasá tur e reinan di tera den rikesa i den sabiduria.
9:23
I tur e reinan di tera tabata buska e presensia di Salomon, pa tende su sabiduria ku Dios a pone den su kurason.
9:24
I tur hende tabata trese su regalo, artíkulonan di plata i di oro, paña pa bisti, arma, speserei, kabai i mula, kada aña un sierto kantidat.
9:25
Awor Salomon tabatin kuater mil stal pa kabai i garoshi, i diesdos mil koredó di kabai; i el a stashoná nan den e statnan di garoshi i serka rei na Jerusalèm.
9:26
I e tabata gobernante riba tur e reinan for di Riu Eufrates te na e tera di e filisteonan i te na e frontera di Egipto.
9:27
I rei a hasi plata mes komun ku piedra na Jerusalèm, i el a hasi palu di seda mes abundante ku palu di sikamor ku ta krese den vaye.
9:28
I nan tabata trese kabai pa Salomon for di Egipto i for di tur tera.
9:29
Awor e demas echonan di Salomon, for di promé te delaster, nan no ta pará skirbí den e buki di profeta Natan, i den e profesia di Ahias e silonita, i den e vishonnan di Ido e miradó, tokante di Jeroboam, yu hòmber di Nabat?
9:30
I Salomon a reina kuarenta aña na Jerusalèm riba henter Israel.
9:31
I Salomon a bai sosegá serka su tatanan i a wòrdu derá den e stat di su tata David, i su yu hòmber Roboam a reina na su lugá.