2 Kronikonan 13
13:1
Den e di diesocho aña di rei Jeroboam, Abias a bira rei di Juda.
13:2
El a reina tres aña na Jerusalèm; i nòmber di su mama tabata Mikaias, yu muhé di Uriel di Gabaa. I tabatin guera entre Abias i Jeroboam.
13:3
I Abias a kuminsá e bataya ku un ehérsito di guereronan balente, kuater shen mil hòmber skohí, mientras ku Jeroboam a bai para den òrdu di bataya kontra djé ku ocho shen mil hòmber skohí, ku tabata guereronan balente.
13:4
E ora ei Abias a bai para riba Seru Zemaraim, ku ta keda den e serunan di Efrain, i a bisa: "Skuchami, Jeroboam i henter Israel:
13:5
boso no sa ku SEÑOR Dios di Israel a duna e gobernashon riba Israel pa semper na David i su yu hòmbernan, pa medio di un aliansa di salu?
13:6
Ma Jeroboam, yu hòmber di Nabat, sirbidó di Salomon, yu hòmber di David, a lanta i a rebeldiá kontra su shon;
13:7
i hòmbernan pèrvèrso a uni kuné, bandidonan ku a resultá muchu fuerte pa Roboam, yu hòmber di Salomon, tempu ku e tabata hoben i tímido i no por a defendé su mes kontra nan.
13:8
"Asina awor boso tin intenshon di resistí e reino di SEÑOR pa medio di e yu hòmbernan di David, pasobra boso ta un multitut grandi, i pasobra boso tin huntu ku boso e bishénan di oro ku Jeroboam a traha komo diosnan pa boso.
13:9
Boso no a kore ku e saserdotenan di SEÑOR, e yu hòmbernan di Aaron i e levitanan, i a nombra saserdotenan pa boso mes manera e pueblonan di otro teranan? Ken ku bin pa konsagrá su mes ku un bishé machu i shete karné chubatu, asta é por bira saserdote di loke no ta diosnan.
13:10
"Ma pa loke ta nos, SEÑOR ta nos Dios, i nos no a bandon'E; e yu hòmbernan di Aaron ta sirbi SEÑOR komo saserdote, i e levitanan ta hasi nan trabou.
13:11
I tur mainta i atardi nan ta kima ofrendanan kimá i sensia aromátiko na SEÑOR, i e pan di proposishon ta wòrdu poní riba e mesa limpi, i e kandelá di oro ku su lampinan ta kla pa sende tur atardi; pasobra nos ta kumpli ku e enkargo di SEÑOR nos Dios, ma boso a bandon'E.
13:12
Awor mira, Dios ta ku nos na kabes, i Su saserdotenan ku tròmpèt di bataya pa zona alarma kontra boso. O yunan di Israel, no bringa kontra SEÑOR Dios di boso tatanan, pasobra boso lo no tin éksito."
13:13
Ma Jeroboam a skonde pa ataká di patras, asina ku Israel tabata dilanti di Juda i e trampa tabata nan tras.
13:14
Ora Juda a bira wak, ata, nan a wòrdu ataká di padilanti i di patras; i nan a sklama na SEÑOR, i e saserdotenan a supla e tròmpètnan.
13:15
E ora ei e hòmbernan di Juda a dal un gritu di guera, i ora ku e hòmbernan di Juda a dal e gritu di guera, a sosodé ku Dios a derotá Jeroboam i henter Israel dilanti di Abias i Juda.
13:16
I ora ku e yunan di Israel a hui dilanti di Juda, Dios a entregá nan den nan man.
13:17
I Abias i su hendenan a derotá nan ku un matansa grandi; i asina sinku shen mil hòmber skohí di Israel a muri.
13:18
Asina e yunan di Israel a wòrdu sometí den e tempu ei, i e yunan di Juda a vense, pasobra nan a konfia den SEÑOR, e Dios di nan tatanan.
13:19
I Abias a pèrsiguí Jeroboam, i a kapturá diferente stat for di djé: Bèt-èl ku su pueblitonan, Jesana ku su pueblitonan, i Efrain ku su pueblitonan.
13:20
I Jeroboam no a rekobrá forsa mas den e dianan di Abias; i SEÑOR a afligié i el a muri.
13:21
Ma Abias a bira poderoso, i a tuma dieskuater esposa pa su mes; i a bira tata di bint'i dos yu hòmber i dieseis yu muhé.
13:22
Awor e demas echonan di Abias, su kamindanan i su palabranan, ta pará skirbí den e relatonan di profeta Ido.