1 Timoteo 2

BSNP Edit

2:1 Pesei, promé ku tur kos, mi ta eksortá pa súplika, orashon, petishon i gradisimentu wòrdu hasí pa tur hende,

2:2 pa reinan i tur esnan ku ta den outoridat, pa nos hiba un bida trankil i ketu den tur santidat i dignidat.

2:3 Esaki ta bon i aseptabel den bista di Dios nos Salbador,

2:4 Kende ta deseá pa tur hende wòrdu salbá i yega na konosementu di e bèrdat.

2:5 Pasobra ta ún Dios so tin, i ún Mediador tambe entre Dios i hende, e hende Cristo Jesus,

2:6 Kende a duna Su mes komo e preis di reskate pa tur hende--e testimonio duná na su debido tempu.

2:7 I pa esaki mi a wòrdu nombrá komo predikadó i apòstel, (mi ta papia bèrdat, mi no ta gaña) komo siñadó di e paganonan den fe i bèrdat.

2:8 Pesei mi kier pa e hòmbernan di tur lugá hasi orashon, hisando mannan santu, sin rabia i sin pleitu.

2:9 Meskos, mi kier pa hende muhé dòrna nan mes ku bistí apropiá, desente i moderá, no ku kabei tur na flègt i oro òf pèrla òf bistí kostoso,

2:10 sino mas bien ku bon obra, manera ta pas pa muhénan ku ta teme Dios.

2:11 Laga hende muhé risibí instrukshon den silensio ku tur sumishon.

2:12 Ma mi no ta pèrmití hende muhé siña hende hòmber ni ehersé outoridat riba hende hòmber, ma pa keda ketu.

2:13 Pasobra ta Adam a wòrdu formá promé, despues Eva.

2:14 I no ta Adam a wòrdu gañá, ma e muhé, siendo gañá, a kai den transgreshon.

2:15 Ma muhénan lo wòrdu salbá dor di e hañamentu di yu, si nan kontinuá den fe i amor i santidat ku modestia.