1 Samuel 5
5:1
Awor e filisteonan a kohe e arka di Dios i a hib'é for di Eben-ezer na Asdod.
5:2
Anto e filisteonan a kohe e arka di Dios i a hib'é na e kas di Dagon i a pon'é banda di Dagon.
5:3
Su manisé, ora ku e asdoditanan a lanta mainta tempran, ata Dagon tabata bentá abou riba su kara dilanti di e arka di SEÑOR. Asina nan a kohe Dagon i a bolbe pon'é na su lugá.
5:4
Ma su manisé, ora nan a lanta mainta tempran, ata Dagon tabata bentá abou riba su kara dilanti di e arka di SEÑOR. I Dagon su kabes i su dos plant'i mannan a wòrdu kòrtá afó riba e drèmpel; solamente Dagon su kurpa a keda.
5:5
Pesei ni e saserdotenan di Dagon, ni ningun hende ku drenta den e kas di Dagon na Asdod, no ta pone pia riba e drèmpel di Dagon na Asdod te dia djawe.
5:6
Awor e man di SEÑOR tabata pisá riba e asdoditanan i El a destrosá nan i a afligí nan ku tumor, tantu Asdod komo su teritorionan.
5:7
Ora ku e hòmbernan di Asdod a mira ku tabata asina, nan a bisa: "E arka di e Dios di Israel no mester keda serka nos, pasobra Su man ta duru riba nos i riba Dagon nos dios."
5:8
Asina nan a manda yama i a reuní tur e prensnan di e filisteonan huntu i a bisa: "Kiko nos mester hasi ku e arka di e Dios di Israel?" I nan a bisa: "Laga e arka di e Dios di Israel wòrdu hibá bèk na Gat." I nan a hiba e arka di e Dios di Israel ayanan.
5:9
I a sosodé ku despues ku nan a hib'é bèk, e man di SEÑOR tabata kontra e stat ku un konfushon masha grandi mes; i El a afligí e hòmbernan di e stat, tantu hoben komo bieu, asina ku nan kurpa a yena ku tumor.
5:10
Asina nan a manda e arka di Dios na Ekron. I a sosodé ku ora e arka di Dios a yega Ekron, e ekronitanan a sklama, bisando: "Nan a trese e arka di e Dios di Israel aki bèk serka nos pa mata nos i nos pueblo."
5:11
Pesei nan a manda yama i a reuní tur e prensnan di e filisteonan i a bisa: "Manda e arka di e Dios di Israel bai, i lagu'é bolbe na su mes lugá, pa e no mata nos i nos pueblo." Pasobra den henter e stat tabatin un konfushon mortal; e man di Dios tabata masha pisá ayanan.
5:12
I e hòmbernan ku no a muri a wòrdu afligí ku tumor, i e sklamashon di e stat a subi te na shelu.