1 Samuel 29
29:1
Awor e filisteonan a reuní tur nan ehérsitonan na Afek, mientras ku e israelitanan tabata kampa banda di e fuente ku ta keda na Jezreel.
29:2
I e prensnan di e filisteonan tabata pasa bai na shennan i na milnan, i David ku su hòmbernan tabata sigui mas patras, huntu ku Akis.
29:3
E ora ei e komandantenan di e filisteonan a bisa: "Ta kiko e hebreonan aki ta hasi akinan?" Anto Akis a bisa e komandantenan di e filisteonan: "Esaki no ta David, sirbidó di Saul, rei di Israel, esun ku tabata huntu ku mi e dianan aki, òf mihó bisá e añanan aki; i mi no a haña ningun falta den djé for di dia ku el a pasa pa mi banda te dia djawe."
29:4
Ma e komandantenan di e filisteonan tabata rabiá kuné, i e komandantenan di e filisteonan a bis'é: "Manda e hòmber aki bai bèk, pa e bolbe na e lugá kaminda bo a pon'é, i no lagu'é bai bataya ku nos, pa e no bira un atversario di nos den bataya. Pasobra ku kiko e hòmber aki por hasi su mes aseptabel serka su señor? No ta ku kabes di e hòmbernan aki?
29:5
Esaki no ta e David, di kende nan ta kanta den e bailenan, bisando: 'Saul a mata su milnan, i David su dies milnan'?"
29:6
E ora ei Akis a yama David i a bis'é: "Manera SEÑOR ta biba, bo tabata hustu, i bo salida i bo entrada huntu ku mi den e ehérsito ta agradabel den mi bista, pasobra for di dia ku bo a bin serka mi te dia djawe mi no a haña maldat den bo. Sinembargo, bo no ta agradabel den bista di e prensnan.
29:7
Pesei awor, bolbe i bai na pas, pa bo no desagradá e prensnan di e filisteonan."
29:8
I David a bisa Akis: "Ma ta kiko mi a hasi? I ta kiko bo a haña den bo sirbidó for di e dia ku mi a bin den bo presensia te dia djawe, ku mi no tin mag di bai bringa kontra e enemigunan di señor mi rei?"
29:9
Ma Akis a kontestá i a bisa David: "Mi sa ku bo ta agradabel den mi bista, manera un angel di Dios; sinembargo, e komandantenan di e filisteonan a bisa: 'E no mag bai bataya huntu ku nos.'
29:10
Pesei anto, lanta mainta tempran huntu ku e sirbidónan di bo señor ku a bin ku bo, i sali bai mainta tempran, asina ku tin klaridat di dia."
29:11
Asina David a lanta tempran, é ku su hòmbernan, pa sali bai mainta, pa bolbe na e tera di e filisteonan. I e filisteonan a subi bai Jezreel.