1 Samuel 24
24:1
Awor a sosodé ku ora Saul a stòp di pèrsiguí e filisteonan, nan a kont'é, bisando: "Mira, David ta den e desierto di En-gadi."
24:2
E ora ei Saul a kohe tres mil hòmber skohí for di henter Israel i a bai buska David ku su hòmbernan dilanti di e Barankanan di e Kabritunan di Mondi.
24:3
I na kaminda el a yega na e kuránan di karné, kaminda tabatin un kueba; i Saul a drenta pa hasi su nesesidat. Awor David ku su hòmbernan tabata sintá den e partinan mas paden di e kueba.
24:4
I e hòmbernan di David a bis'é: "Mira, esaki ta e dia di kual SEÑOR a bisabo: 'Mira, mi ta bai entregá bo enemigu den bo man, i lo bo hasi kuné manera bo ta haña ta bon.'" E ora ei David a lanta i ketu-ketu a kòrta zòm di Saul su mantel kit'afó.
24:5
I despues a sosodé ku David su konsenshi tabata molesti'é, pasobra el a kòrta zòm di Saul su mantel kit'afó.
24:6
Pesei el a bisa su hòmbernan: "Ku esaki sea leu di mi di hasi un kos asin'aki ku mi señor, SEÑOR Su ungí, di lanta mi man kontra djé, siendo ku e ta SEÑOR Su ungí."
24:7
I David a reprendé su hòmbernan ku e palabranan aki i no a pèrmití nan lanta kontra Saul. I Saul a lanta, a sali for di e kueba i a sigui su kaminda.
24:8
Despues David a lanta i a sali for di e kueba i a grita Saul, bisando: "Mi señor rei!" I ora Saul a drai wak, David a tira su kurpa abou i a bùig ku su kara te na suela i a mustra reverensia.
24:9
I David a bisa Saul: "Pakiko bo ta skucha e palabranan di hende ora nan bisa: 'Mira, David ta buska pa hasibo daño'?
24:10
Ata, riba e dia aki bo wowo a mira ku SEÑOR a entregábo awe den mi man den e kueba, i algun di mi hendenan a bisa pa matabo; ma mi a haña duele di bo, i mi a bisa: 'Lo mi no lanta mi man kontra mi señor, pasobra e ta SEÑOR Su ungí.'
24:11
Awor mi tata, mira! Sí, mira e zòm di bo mantel den mi man! Pasobra komo mi a kòrta zòm di bo mantel kit'afó, ma no a matabo, komprendé i mira ku no tin maldat ni rebeldia den mi man, i mi no a peka kontra bo, ounke ku bo ta skonde warda pa kita mi bida.
24:12
Ku SEÑOR huzga entre abo i ami, i ku SEÑOR tuma vengansa pa mi kontra bo, ma mi man lo no ta kontra bo.
24:13
Manera e proverbio di e bieunan ta bisa: 'For di e malbado ta sali maldat', ma mi man lo no ta kontra bo.
24:14
"Tras di ken rei di Israel a sali? Ta ken bo ta pèrsiguí? Un kachó morto, un purga?
24:15
Pesei, SEÑOR sea hues i huzga entre abo i ami; i ku E mira i pleita mi kaso, i librami for di bo man."
24:16
Awor a sosodé ku ora David a kaba di papia e palabranan aki ku Saul, Saul a bisa: "Ta bo bos esaki, mi yu David?" E ora ei Saul a halsa su bos i a yora.
24:17
I el a bisa David: "Abo ta mas hustu ku mi, pasobra abo a trata bon ku mi, mientras ku ami a trata malu ku bo.
24:18
I awe bo a deklará ku bo a hasi bon na mi, ku SEÑOR a entregámi den bo man i tòg bo no a matami.
24:19
Pasobra si un hende haña su enemigu, lo e lagu'é bai sano i salvo? Pesei, ku SEÑOR rekompensábo ku bon pa loke bo a hasi pa mi riba e dia aki.
24:20
I awor, mira, mi sa ku siguramente lo bo bira rei, i ku e reino di Israel lo keda stablesí den bo man.
24:21
Pesei awor, hurami pa SEÑOR ku lo bo no kòrta kita mi desendientenan afó despues di mi, i ku lo bo no destruí mi nòmber for di e kas di mi tata."
24:22
I David a hura na Saul. I Saul a bai su kas, ma David ku su hòmbernan a subi bai na e lugá fortifiká.