1 Reinan 17
17:1
Awor Elias e tisbita, kende tabata un di e hendenan ku tabata biba temporalmente na Galaad, a bisa Akab: "Manera SEÑOR, e Dios di Israel, ta biba, dilanti di Kende mi ta para, siguramente lo no tin ni serena ni awaseru e añanan aki, si no ta pa medio di mi palabra."
17:2
I e palabra di SEÑOR a yega na Elias, bisando:
17:3
"Bai for di aki i bira bai pariba, i skonde banda di Roi Kerit, ku ta keda pariba di Jordan.
17:4
I lo bo bebe for di e roi, i Mi a ordená e rafnan pa dunabo di kome ayanan."
17:5
Asina el a bai i a hasi konforme e palabra di SEÑOR, pasobra el a bai i a biba banda di Roi Kerit, ku ta keda pariba di Jordan.
17:6
I e rafnan tabata trese pan ku karni p'é mainta i pan ku karni atardi; i e tabata bebe for di e roi.
17:7
I a sosodé ku despues di un tempu e roi a seka, pasobra awaseru no a kai na e tera.
17:8
E ora ei e palabra di SEÑOR a yega na djé, bisando:
17:9
"Lanta, bai Sarepta, ku ta pertenesé na Sidon, i keda ayanan; mira, ayanan Mi a duna un biuda òrdu pa dunabo di kome."
17:10
Asina el a lanta i a bai Sarepta, i ora ku el a yega na porta di e stat, mira, tabatin un biuda einan ta piki palu; i el a yam'é i a bisa: "Pa fabor, buska poko awa den un butishi pa mi, pa mi bebe."
17:11
I ora ku e tabata bai kohe esaki, el a yam'é i a bisa: "Pa fabor, trese pida pan pa mi den bo man."
17:12
Ma el a bisa: "Manera SEÑOR bo Dios ta biba, mi no tin pan, solamente un man di hariña den e kòmchi i un tiki zeta den e butishi; i mira, mi ta piki algun pida palu pa mi bai paden i prepar'é pa mi ku mi yu hòmber, pa nos kom'é i muri."
17:13
E ora ei Elias a bis'é: "No tene miedu; bai, hasi manera bo a bisa, ma traha un pan buskuchi chikitu for di djé pa mi promé, i tres'é pa mi; i despues bo por traha un pa bo mes i pa bo yu hòmber.
17:14
Pasobra asina e SEÑOR Dios di Israel ta bisa: 'E kòmchi di hariña lo no bira bashí, ni e butishi di zeta lo no bira bashí, te dia ku SEÑOR manda awaseru riba e superfisio di tera.'"
17:15
Asina el a bai i a hasi konforme e palabra di Elias; i é ku Elias i e hendenan di su kas a kome pa hopi dia.
17:16
E kòmchi di hariña no a bira bashí ni e butishi di zeta no a bira bashí, konforme e palabra di SEÑOR ku El a papia pa medio di Elias.
17:17
Awor a sosodé ku despues di e kosnan aki, e yu hòmber di e muhé, e ama di kas, a bira malu; i su malesa tabata asina grave ku no a keda rosea den djé.
17:18
Pesei e muhé a bisa Elias: "Ta kiko mi tin di hasi ku bo, O hòmber di Dios? Bo a bin serka mi pa trese mi inikidat na memoria i pa mata mi yu!"
17:19
I el a bis'é: "Dunami bo yu." Anto el a koh'é for di den su skochi i a kargu'é subi bai kuné na e kamber ariba, kaminda e tabata keda, i a pon'é riba su mes kama.
17:20
I el a sklama na SEÑOR i a bisa: "O SEÑOR mi Dios, Bo a trese kalamidat tambe riba e biuda serka ken mi ta keda, dor di laga su yu muri?"
17:21
E ora ei el a rèk su mes tres biaha riba e mucha, i a sklama na SEÑOR, i a bisa: "O SEÑOR mi Dios, mi ta rogaBo, laga bida di e mucha aki bolbe den djé."
17:22
I SEÑOR a tende e bos di Elias; i bida di e mucha a bolbe den djé, i el a rebibá.
17:23
I Elias a kohe e mucha i a baha kuné for di e kamber ariba hib'é den kas, i a entregu'é na su mama; i Elias a bisa: "Mira, bo yu ta bibu!"
17:24
E ora ei e muhé a bisa Elias: "Awor mi sa ku bo ta un hòmber di Dios, i ku e palabra di SEÑOR den bo boka ta bèrdat."