1 Korintionan 6

BSNP Edit

1 Korintionan 6

6:1 Ken di boso, ora ku e tin un kaso kontra un otro ruman, ta tribi bai korte dilanti di e inhustunan i no dilanti di e santunan?

6:2 Of boso no sa ku ta e santunan lo huzga mundu? I si ta boso ta huzga mundu, boso no ta kompetente pa huzga e kasonan hudisial di mas chikitu?

6:3 Boso no sa ku nos lo huzga angelnan? Kuantu mas anto asuntonan di e bida aki?

6:4 Si boso anto tin kasonan hudisial ku ta trata asuntonan di e bida aki, boso lo a apuntá komo hues esnan ku no ta konta den iglesia?

6:5 Mi ta bisa esaki pa brongosá boso. T'asina ku no tin ni un hòmber sabí meimei di boso ku ta kapas pa disidí entre su rumannan,

6:6 ma ku ruman ta hiba ruman dilanti di hues, i esei dilanti di inkrédulonan?

6:7 E echo ku boso tin kasonan hudisial kontra otro ya ta un tremendo fayo pa boso. Pakiko boso no ta preferá di sufri inhustisia? Pakiko boso no ta preferá di wòrdu perhudiká?

6:8 Alkontrario, boso mes ta kometé inhustisia i ta defroudá otro, anto boso mes rumannan.

6:9 Of boso no sa ku e inhustunan lo no eredá e reino di Dios? No laga nan gaña boso; ni fornikadó, ni adoradó di dios falsu, ni adúltero, ni sodomita, ni homoseksual,

6:10 ni ladron, ni esnan golos pa plaka, ni buraché, ni blasfemadó, ni estafadó lo no eredá e reino di Dios.

6:11 I asina algun di boso tabata; ma boso a wòrdu labá, ma boso a wòrdu santifiká, ma boso a wòrdu hustifiká den e nòmber di Señor Jesu-Cristo i den e Spiritu di nos Dios.

6:12 Tur kos ta pèrmití pa mi, ma tur kos no ta kumbiní; tur kos ta pèrmití pa mi, ma lo mi no laga nada dominámi.

6:13 Kuminda ta pa stoma, i stoma ta pa kuminda; ma Dios lo kaba ku tur dos. Sinembargo, e kurpa no ta pa inmoralidat, ma pa Señor; i Señor ta pa e kurpa.

6:14 Awor Dios no solamente a lanta Señor, ma lo lanta nos tambe dor di Su poder.

6:15 Boso no sa ku boso kurpanan ta miembronan di Cristo? Lo mi kita e miembronan di Cristo anto i hasi nan bira miembro di un prostituta? Di ningun manera!

6:16 Of boso no sa ku esun ku uni su mes ku un prostituta ta ún kurpa kuné? Pasobra E ta bisa: "E dosnan lo bira ún karni."

6:17 Ma esun ku uni su mes ku Señor ta ún spiritu kunE.

6:18 Hui for di inmoralidat. Tur otro piká ku un hende kometé ta pafó di e kurpa, ma e hende inmoral ta peka kontra su mes kurpa.

6:19 Of boso no sa ku boso kurpa ta e tèmpel di Spiritu Santu, Kende ta den boso, Kende boso tin di Dios, i ku boso no ta pertenesé na boso mes?

6:20 Pasobra boso a wòrdu kumprá pa un preis: pesei glorifiká Dios den boso kurpa.

1 Korintionan 5 1 Korintionan 7