1 Korintionan 4
4:1
Laga hende konsiderá nos asin'aki: manera sirbidónan di Cristo i mayordomonan di e misterionan di Dios.
4:2
Ademas, ta wòrdu rekerí di mayordomo ku kada un ta wòrdu hañá fiel.
4:3
Ma pa mi ta di poko importansia si mi wòrdu huzgá dor di boso òf dor di un tribunal humano; en realidat, ni ami mes no ta huzga mi mes.
4:4
Mi konsenshi no ta akusámi di nada, sinembargo, mi no ta wòrdu hustifiká dor di esaki; ma Esun ku ta huzgami ta Señor.
4:5
Pesei, no sigui huzga promé ku tempu, ma warda te ora Señor bin, Kende tambe lo trese na kla e kosnan skondí den skuridat i deskubrí e intenshonnan di kurason di hende; i e ora ei kada hende lo risibí su elogio for di Dios.
4:6
Awor e kosnan aki, rumannan, mi a apliká na mi mes i na Apolos pa boso benefisio, pa boso por a siña for di nos di no pensa mas di loke ta skirbí, pa ni un di boso no bira arogante un kontra otro.
4:7
Pasobra ta ken ta konsiderábo superior? I kiko bo tin ku bo no a risibí? Ma si bo a risibié, pakiko bo ta gaba komo si fuera bo no a risibié?
4:8
Ya boso ta yen kaba, boso a bira riku kaba, boso a bira rei sin nos; ai, mara bèrdè ku boso a bira rei, pa nos tambe por a reina huntu ku boso.
4:9
Pasobra mi ta pensa ku Dios a pone nos, apòstelnan, komo último, komo hòmbernan sentensiá na morto; pasobra nos a bira un spetakel pa mundu, tantu pa angel komo pa hende.
4:10
Nos ta bobonan pa kousa di Cristo, ma boso ta sabí den Cristo. Nos ta debil, ma boso ta fuerte; boso ta distinguí, ma nos ta sin onor.
4:11
Te na e momento aki nos ta padesé hamber i set, nos ta kasi sunú, nos ta wòrdu tratá brutu i nos no tin lugá di biba;
4:12
i nos ta traha mata kurpa, trahando ku nos mes mannan; ora nos wòrdu insultá, nos ta bendishoná; ora nos wòrdu pèrsiguí, nos ta soportá;
4:13
ora nos wòrdu kalumniá, nos ta purba di rekonsiliá; nos a bira meskos ku basura di mundu, e sushedat di tur kos, te awor aki.
4:14
Mi no ta skirbi e kosnan aki pa brongosá boso, ma pa spièrta boso komo mi yunan stimá.
4:15
Pasobra maske boso lo tabatin dies mil edukadó den Cristo, tòg boso lo no tin hopi tata, pasobra den Cristo Jesus t'ami a bira boso tata pa medio di e evangelio.
4:16
Pesei mi ta eksortá boso, sea imitadónan di mi.
4:17
Pa e motibu aki mi a manda Timoteo serka boso, kende ta mi yu stimá i fiel den Señor, i e lo hasi boso kòrda mi kamindanan ku ta den Cristo, manera mi ta siña tur parti den tur iglesia.
4:18
Awor algun a bira arogante, keriendo ku mi no ta bin serka boso.
4:19
Ma pronto lo mi bin serka boso, si Señor kier, i lo mi haña sa, no e palabranan di esnan ku ta arogante, ma nan poder.
4:20
Pasobra e reino di Dios no ta konsistí di palabra, sino di poder.
4:21
Kiko boso kier? Ta ku bara mi mester bin serka boso òf ku amor i un spiritu di suavidat?