1 Kronikonan 19
19:1
Awor a sosodé ku despues di esaki, Nahas, rei di e yu hòmbernan di Amon, a muri, i su yu hòmber a bira rei na su lugá.
19:2
Anto David a bisa: "Lo mi mustra kariño na Hanun, yu hòmber di Nahas, pasobra su tata a mustrami kariño." Asina David a manda mensaheronan pa konsol'é pa motibu di morto di su tata. I David su sirbidónan a yega tera di e yu hòmbernan di Amon, serka Hanun, pa konsol'é.
19:3
Ma e prensnan di e yu hòmbernan di Amon a bisa Hanun: "Bo ta kere ku ta onra David ta onra bo tata ku el a manda konsoladó serka bo? Su sirbidónan no a bin serka bo pa ristra, pa derotá i pa spioná e tera?"
19:4
Asina Hanun a kohe David su sirbidónan, a feita nan i a kòrta nan paña na mitar kit'afó pareu ku nan hep, i a manda nan bai.
19:5
E ora ei algun hende a bai konta David tokante di e hòmbernan. I el a manda hende bai topa ku nan, pasobra e hòmbernan a wòrdu umiyá masha. I rei a bisa: "Keda na Jeriko te ora boso barba krese i e ora ei boso bolbe."
19:6
Ora ku e yu hòmbernan di Amon a mira ku nan a hasi nan mes un abominashon pa David, Hanun i e yu hòmbernan di Amon a manda mil talento di plata pa hür garoshi i koredó di kabai pa nan mes for di Mesopotamia, for di Aram-maaka i for di Soba.
19:7
Asina nan a hür pa nan mes trint'i dos mil garoshi, i tambe nan a hür e rei di Maaka i su hendenan, ku a bin kampa dilanti di Medeba. I e yu hòmbernan di Amon a reuní huntu for di nan statnan i a bin bataya.
19:8
Ora David a tende esaki, el a manda Joab i henter e ehérsito, e hòmbernan poderoso.
19:9
I e yu hòmbernan di Amon a sali i a pone nan mes den òrdu di bataya na entrada di e stat, i e reinan ku a bin a keda nan so den sabana.
19:10
Awor ora Joab a mira ku e bataya tabata kontra djé dilanti i patras, el a skohe for di tur e hòmbernan skohí di Israel i a pone nan den òrdu di bataya kontra e sirionan.
19:11
Ma e hendenan ku a resta el a pone den man di su ruman hòmber Abisai; i nan a pone nan mes den òrdu di bataya kontra e yu hòmbernan di Amon.
19:12
I Joab a bisa: "Si e sirionan ta muchu fuerte pa mi, e ora ei abo lo yudami; ma si e yu hòmbernan di Amon ta muchu fuerte pa bo, e ora ei ami lo yudabo.
19:13
Sea fuerte, i laga nos mustra nos mes yen di kurashi pa kousa di nos pueblo i pa e statnan di nos Dios; i ku SEÑOR hasi loke ta bon den Su bista."
19:14
Asina Joab i e pueblo ku tabata huntu kuné a hala serka pa bringa kontra e sirionan, i nan a hui su dilanti.
19:15
Ora ku e yu hòmbernan di Amon a mira ku e sirionan a hui, nan tambe a hui dilanti di su ruman hòmber Abisai i a drenta stat. Anto Joab a bin Jerusalèm.
19:16
Ora ku e sirionan a mira ku nan a wòrdu derotá dor di Israel, nan a manda mensaheronan i a saka e sirionan ku tabata na e otro banda di Riu Eufrates, i Sofak, komandante di e ehérsito di Hadadezer, tabata guia nan.
19:17
Ora nan a konta David esaki, el a reuní henter Israel huntu, a krusa Jordan, a bin riba nan i a bai para den òrdu di bataya kontra nan. I ora David a bai para den òrdu di bataya kontra e sirionan, nan a bringa kontra djé.
19:18
I e sirionan a hui dilanti di Israel, i di e sirionan David a mata shete mil koredó di garoshi i kuarenta mil sòldá-na-pia, i a mata Sofak, komandante di e ehérsito.
19:19
I ora ku e sirbidónan di Hadadezer a mira ku nan a wòrdu derotá dor di Israel, nan a hasi pas ku David i a sirbié. Asina e sirionan no tabata kier a yuda e yu hòmbernan di Amon mas.